शाही अन्त्येष्टि
बैंकक : गत वर्ष निधन भएका थाईल्याण्डका नरेशको बिहीबार अन्त्येष्टि गरिएको छ ।
सात दशकसम्म गद्दीमा रहनु भएका नरेश भूमीबोलको गत वर्ष अक्टोबरमा ८८ वर्षका उमेरमा निधन भएको थियो । अन्त्येष्टि समारोहमा लाखौँ जनता सहभागी भएर स्वर्गीय नरेश भूमीबोल अदुल्यादेजप्रति अन्तिम श्रद्धान्जलि व्यक्त गरेका छन् ।
दाहसंस्कारस्थल तर्फ लैजाँदै गर्दा हजारौँ थाई नागरिकहरुले सडकहरुको दुवैपट्टिबाट दिवंगत नरेशप्रति श्रद्धान्जलि दिएका थिए ।
शाही संस्कारअनुसार उहाँको दाहसंस्कार गरिएको थाईल्याण्डका सञ्चार माध्यमले जनाएका छन् । शवयात्रा गर्नुअघि शाही दरबारमा श्रृंखलाबद्ध रुपमा शाही संस्कार अनुसारका विभिन्न धार्मिक संस्कारहरु गरिएको थियो ।
स्व राजा भुमीबोललाई आधुनिक थाइल्याण्डका निर्माता पनि मानिने भएकाले उहाँप्रति जनताको उच्च सम्मान रहेको थियो । -(रासस)
