चिसो हात हुनेहरू छामेर भन्छन् –

शरीर तातैछ;

तातो हात हुनेहरू भन्छन् –

सेलाईसक्यो !

कोही भन्छन् –

अब यस्को आत्मा छैन;

कोही भन्छन् –

यो हाम्रो हातमा छैन;

कोही भन्छन् –

यो हाम्रो साथमा  छैन;

कोही भन्छन् –

आराम यस्को गाथमा छैन;

कोही भन्छन्-

यो अब गयो,

फर्कदैन ;

कसैको अडकल-

शरीर पूरै बिषाक्त छ;

तेसैले यो अशक्त छ।

कसैको ठम्याई-

मसान लागेको हैन,

गानो जागेको छैन,

धुकधुकी भागेको छैन ।

थाहा होला-

नाडी छाम्नेलाई या,

जिभ्रो डाम्नेलाई या,

आँखा फार्नेलाई या,

भूत झार्नेलाई या,

बैतरणी तार्नेेलाई ।

जेहोस्  !

आत्मा जागेको देख्ने

सबैको रहर छ ।

आगे,

यसमा जो जे ठहर्छ !

राजनीति भनेको त पसल रहेछ

जति नाफाभो उति असल रहेछ

टुक्रे पसलबाट बेच्ने दिन गएछ

ठूलो पसलमापो धेरै नाफा रहेछ ।

                    २

मल जल बीउ भनेको ‘मनि’ रहेछ

तेसलाई गोडमेल गर्ने मसल रहेछ

भ्रष्टाचार उत्पादित फसल रहेछ

जुन चिज सबभन्दा असल रहेछ ।

                   3

राजनीति भनेको त सुरा रहेछ

मात्तिएर बोलेको कुुरा रहेछ

एकापसमा ठोक्किने चुरा रहेछ

पिठ पछाडि धस्ने छुरा रहेछ ।