खुच्चिङ

नपिएरै मात लागि ढल्नेलाई खुच्चिङ
विना कारण भित्र भित्रै जल्नेलाई खुच्चिङ
चोरी गर्ने पासभए पढ्नेलाई खुच्चिङ
धोकापाई जातले माथा रगड्नेलाई खुच्चिङ

लाम मिच्ने छिटो भए लाम लाग्नेलाई खुच्चिङ
बेला धड्किसकेपछि जाग्नेलाई खुच्चिङ
सुनै, सुन केवल सुन ताक्नेलाई खुच्चिङ
धामीलाई कालो भाले भाक्नेलाई खुच्चिङ

सतहका भुरा माछाहरूलाई खुच्चिङ
तड्पिएका ठूला बाछा लाईपनि खुच्चिङ
जामभित्र अड्किकन बस्नेलाई खुच्चिङ
महँगीको डोरी पेटमा कस्नेलाई खुच्चिङ

कल्पनाको आकाशबाट झर्नेलाई खुच्चिङ
भाग्य दिन्छ तर कर्म नगर्नेलाई खुच्चिङ
फाटेजति फेेसन भए नफाटेकोलाई खुच्चिङ
सत्ताभित्र बसी स्वाद नचाटेकोलाई खुच्चिङ

रङ्गाएको दारी सेतो देखिनेलाई खुच्चिङ
बङ्ग्याएको कुरा सिधा लेखिनेलाई खुुच्चिङ
उमेर पूरै नढाक्दिने लालीलाई खुच्चिङ
बेमौसममा लगाएको बालीलाई खुच्चिङ

टन्न खाई जुँघा तिर लगाउनेलाई खुच्चिङ
इज्जत जति खोलातिर बगाउनेलाई खुच्चिङ
हिरा मोती छाडी ढुङ्गा टिप्नेलाई खुच्चिङ
कलङ्कले आफ्नै मुख लिप्नेलाई खुच्चिङ

आफ्नो कुरा आफूलेनै नबुझ्नेलाई खुच्चिङ
सहि कुरा कहिल्यै पनि नसुझ्नेलाई खुच्चिङ
अरूको कान भर्न कहिल्यै नडर्नेलाई खुुच्चिङ
गाली खाई कहिल्यै पेट नभर्नेलाई खुच्चिङ

देखावटी रुपमा हुने पुण्यलाई खुच्चिङ
बुद्धि मात्र बढी विवेक शून्यलाई खुच्चिङ
छिनछिनमा फेरिने रुप रङ्गलाई खुच्चिङ
अवरोहतिर जाने ढङ्गलाई खुच्चिङ

अरूलाई कहिल्यै चिप्लो नघस्नेलाई खुच्चिङ
संस्थापन पक्षभित्र नबस्नेलाई खुच्चिङ
बुई चढी हिड्नेलाई झरे पछि खुच्चिङ
कहिल्यै पूरा नहुुने आश मरेपछि खुच्चिङ

नलेखिएका अनगिन्ती कहानीलाई खुच्चिङ
पचाउन नसकेको बेइमानीलाई खुच्चिङ
खलनायकको मुक्काखाने नायकलाई खुच्चिङ

नालायकको कदर भए लायकलाई खुच्चिङ

बिकाउछ यहाँ सबै नकिन्नेलाई खुच्चिङ
देश काल परिस्थिति नचिन्नेलाई खुच्चिङ
झेल भए पनि सही, हार्नेलाई खुच्चिङ
माछो दिई भ्यागुतो हात पार्नेलाई खुच्चिङ

मच्छड जति भित्र जाने झुललाई खुुच्चिङ
दुई दिनमै ओइली जाने फूललाई खुच्चिङ
आकाशबाट झरिजाने तारालाई खुच्चिङ
माग पूरा नहुने जति नारालाई खुच्चिङ

केही दिनमै फेरिइजाने फेसनलाई खुच्चिङ
फेसनको नराम्रो त्यो इम्प्रेशनलाई खुच्चिङ
लोकतन्त्रको सदाबहार मन्त्रलाई खुच्चिङ
कैयौं राजा पाल्ने गणतन्त्रलाई खुच्चिङ ।