जब सन्ध्या हुन्छ …..

“दाजु हजुरहरुको फोटो पोज साह्रै मन पर्यो, के म खिच्दिउं कि ?” नारायणी किनारमा सूर्यास्तको समयमा साथीसँग मोबाइलले सेल्फी लिदैं गर्दा DSLR क्यामेरा भिरेका एक युवकले मलाई प्रश्न गरे । पंत्तिकार आफै फोटोपत्रकार भएका कारण “खिचेको बापत केही गर्नु पर्दछ ?” सोधि हालें । उसले हास्दैं भन्यो “ २५ रुपैँया एक फोटोको , राम्रो खिचिदिन्छु ।” मैले नि हास्दैं भने “ धन्यवाद भाई, म पनि तिमी जस्तै फोटोग्राफर हुं,मेरो पनि क्यामरा ब्याग उ तल किनारमा लडिरहको छ, एकछिन रमाइलो गर्न भारी बिसाएको मात्रै, हामी दुइको पेशा एउटै ,मात्र फरक क्षेत्रमा । तर सेवा गरेर मिहिनेत गरिरहेको छौ । बधाई छ ।” यति भने पछि त्यो युवक मुसुक्क हाँस्दै नजिकै रहेको युवतीहरुको झुण्डतिर हुँइकियो ।

चितवनको नारायणगढको नारायणी नदी किनारमा साँझको समयमा युवकहरुको एक जमात DSLR क्यामेरा सहित डुल्न आउने मानिसहरुको फोटो खिच्न सधैं तल्लीन हुन्छन । अहिले नारायणी नदी किनार गर्मी बिर्साउने थलो नै बनेको छ । दिनभरको अत्यधिक गर्मीले आत्तिएकाहरु सांँझपख नदी किनारमा चिसो मौसममा रमाउन जान्छन् । आसपासका स्थानीय मात्र नभई टाढा घर भएकाहरू पनि केहीबेर नदी किनारमा रमाउन आउंछन । अफिसको काम सकेर, विद्यालय,कलेज बाट पनि साथीहरुसँग घुम्न आउनेहरु युवायुवतीहरुको भीड नै लाग्ने गर्दछ । नदी किनारमा गर्मी भगाउन बालबच्चा सहित अभिभावकहरु,वृद्ध, वृद्धाहरुको घुइँचो लाग्ने गर्दछ । नदी किनारमा बहने चिसो हावाको आनन्द लिएर साथीहरूसँग घुम्दा दिनभरको कामको तनाव र थकान बिर्सिन सहज हुने गीतानगरकी सुजाता अधिकारीले बताइन् ।

नदी किनारमा शिवमूर्ति, बुद्धमूर्ति, हात्तीहरु तथा गोही निर्माण गरिएका छन् । मानिसहरुको चहलपहल हुने भएका कारण व्यावसाियक स्ट्रिटफुड स्टल, आइसक्रिम, पानीपुरी तथाचटपटे स्टल, पोलेको मकै, फुल्कीको व्यापार यहाँ निकै फस्टाएको छ । सौर्य बत्तीको उज्यालोका कारण गर्मीको समयमा नदी किनारको चिसोमा राति अबेरसम्म पनि टहलिनेहरू थुप्रै हुन्छन् । कोही मोटरबोट सयर गरेर रमाइलो गरिहेका हुन्छन भने माझीहरु माछा आफनो जालमा पार्न खोजिरहेको देखिन्छ । नयाँ वर्ष २०७६ को सुरुवातदेखि नदी किनारमा गण्डक आरतीसमेत सुरु भएको छ । अखण्ड सन्ध्याकालिन गण्डकी(नारायणी महाआरती)ले नारायणी नदी किनारमा अझ रौनकता बढाएको छ। महाआरती दर्शनका लागि आउनेको भीड लाग्ने गरेको छ । पाँचजना बटुकले शंख ध्वनीबाट महाआरतीको प्रारम्भ गरेर करीब ५० मिनेटसम्म धार्मिक विधिअनुसार आरती र भजनकीर्तन हुन्छ। संगीतको मिठो धुनमा हुने भजनसहित महाआरतीले सबैलाई मोहित बनाउँछ ।

त्यसैले नारायणी नदी किनारमा महाआरती सुरु गरेपछि साँझपख मन्त्रमुग्ध भएको छ। झमक्क साँझमा सुस्ताइरहेको नारायणी नदी किनारमा गुञ्जिने भजनले सबैलाई आकर्षित गर्दछ । आरती सुरु भएयता धार्मिक आस्था हुने मात्र नभई आरती गरेको फोटो खिचेर रमाउनेहरू पनि बढेको छ । नारायण नदी किनारलाई चितवनकै महत्वपूर्ण पर्यटकीय गन्तव्य तथा धार्मिक पर्यटनको सम्भाव्यता सहित अघि बढेमा भविष्यमा पर्यटकीय स्थलकै रूपमा विकास हुने कुरामा दुई मत नरहेको नारायणघाटका रेस्टुरेन्ट व्यवसायी सन्तोष पौडेल बताउँछन्।