२०८१, ४ माघ शुक्रबार
यूनिकोड

बेलायतमा कोरोनाबाट थप तीन नेपालीको मृत्यु

लन्डन, वैशाख १२ : बेलायतमा कोरोना भाइरसको संक्रमणका कारण थप तीन जना नेपालीको मृत्यु भएको छ। योसँगै बेलायतबाट मृत्यु हुने नेपालीको संख्या २० पुगेको छ।

कोरोना भाइरसको सङ्क्रमण देखिएपछि दुई हप्ताअघि लन्डनको रोयल फ्री अस्पतालमा भर्ना भएका ७२ वर्षीय गोपाल शाहीको उपचारका क्रममा सोमबार राति मृत्यु भएको लन्डनस्थित नेपाली दूतावासका प्रवक्ता शरदराज आरणले बताए।

प्यूठान घर भएका गुरुङ बसाइँसराइ गरी भारत बस्दै आएका थिए। भूपू गोरखा सैनिकका परिवारलाई बेलायतमा बस्न दिने निर्णय भएपछि उनी लन्डनको बस्न थालेका थिए।

आफ्ना छोरी ज्वाइँलाई समेत बेलायत ल्याउन आर्थिक हिसाबले सजिलो होस् भनेर पछिल्लो समय उनले पूर्णकालीन रुपमा कामसमेत गर्दै आएको समाजसेवी लीलादेवी गुरुङले बताए।

खोटाङ घर भई हाल बेलायतको ननिटनमा बस्ने बीमा नाछिरिङ राईको पनि उपचारका क्रममा जर्ज इलिट अस्पतालमा मृत्यु भएको छ। उनी भूपू गोरखा सैनिक डाकबहादुर राई र देशी राईकी माइली छोरी हुन। उनी गत वर्ष मात्र बेलायत आएकी थिइन्।

एक साताअघि कोरोनाको सङ्क्रमण भएर अस्पताल भर्ना भएकी राईलाई पहिलेदेखि मिर्गौलाको समस्या रहेको ब्रिटिश गोरखा भेट्रन्स एशोसिएसनका महासचिव भीम सारुमगरले बताए।

त्यस्तै कोरोना सङ्क्रमणबाट बेलायतमा थप एक नेपालीको बुधबार मृत्यु भएको छ। बेलायतको रेडिङ शहरमा बस्दै आएका ६५ वर्षीय हंशराज लिङ्देनको उपचारका क्रममा रोयल बर्कसायर अस्पतालमा निधन भएको नातेदार विजयविक्रम लिङदेलले बताए।

तीन साताअघि अस्पताल भर्ना भए पनि तीन दिन पहिला मात्रै कोरोना भएको अस्पतालले पुष्टि गरेको थियो। उच्च रक्तचापको नियमित औषधि सेवन गर्ने लिङ्देल १४ वर्षदेखि परिवारका साथ बेलायत बस्दै आइरहेको समाजसेवी कमल गुरुङ बताए। (रासस)