नेपाली युवा दिवेश पोखरेल (आर्थर गन) अमेरिकन आइडलको उपविजेता बने

काठमाडौं, जेठ ५ : नेपाली युवा दिवेश पोखरेल (आर्थर गन) १८ औं अमेरिकन आइडलको उपबिजेता बनेका छन् ।

आज भएको फाइनल राउण्डका क्रममा भोटिङका आधारमा दिवेश उपबिजेता बन्दै दोश्रो स्थान हासिल गरेका हुन् । उपाधिको दावेदारका रुपमा हेरिएका दिवेशलाई उपाधि चुम्न पर्याप्त भोट आएन । दिवेशलाई पछि पार्दै जस्ट साम अमेरिकन आइडल बनिन् ।  

अन्तिम प्रस्तुतिमा पोख्रेलले आई डन्ट वान्ट टु बी बोलको पहिलो गीत गाएका थिए । गत हप्ता अमेरिकन आइडलका टप ७ प्रतिस्पर्धीको घोषणा गरिएको थियो । टप ७ मा अघिल्लो साता दिवेश पोखरेल–आर्थर गन, जस्ट साम, जोनी वेष्ट, डिलोन जेम्स, फ्रान्सिस्को मार्टिन, जुलिया गार्गानो र लुइस नाइट टप ७ मा पुगेका थिए ।

यी ७ जनामध्येबाट आजको एपिसोडको सुरुवातमै टप ५ को घोषणा गरिएको थियो । अमेरिकन आइडलको फाइनलमा पुग्ने दिवेश नै पहिलो नेपाली हुन् ।