कोरोना सङ्क्रमणको जोखिम बढेपछि कारागारमा उच्च सतर्कता

दमौली, १८ भदौ : कोरोना सङ्क्रमणको जोखिम बढेसँगै जिल्ला कारागार तनहुँमा उच्च सतर्कता अपनाइएको छ । दिनदिनै कारागारमा कैदीबन्दी थपिनेक्रम बढेसँगै कारागार प्रशासनले उच्च सतर्कता अपनाएको हो ।

विभिन्न मुद्दामा फरार रहेर पक्राउ परेका प्रतिवादीलाई जिल्ला कारागार तनहुँमा छुट्टै कोठाको व्यवस्था गरिएको छ । कोरोनाको जोखिम बढेपछि कारागार प्रशासनले त्यस्ता व्यक्तिलाई राख्नका लागि कारागारको नयाँ भवनमा दुई वटा कोठा तयार गरेको कारागारका प्रमुख नारायण अधिकारीले जानकारी दिनुभयो ।

उहाँले पक्राउ परेका त्यस्ता व्यक्तिलाई अदालतमा पेश गरेपछि कारागार चलान गर्ने गरिएकाले जोखिम बढेको हुँदा छुट्टै कोठामा राख्न थालिएको जानकारी दिनुभयो । जिल्ला प्रहरी कार्यालय तनहुँले पछिल्लो समयमा फरार प्रतिवादी पक्राउ गर्ने अभियान नै चलाएको छ । “पछिल्लो अवधिमा मात्रै ४०–४५ जना फरार प्रतिवादी कारागारमा आएका छन्”, कारागार प्रमुख अधिकारीले भन्नुभयो, “त्यस्ता व्यक्तिबाट कारागारमा कोरोना सङ्क्रमणको जोखिम बढ्ने खतरा भएपछि उनीहरुलाई कारागारका पुराना कैदीबन्दीसँग घुलमिल गराएका छैनाँै ।”

अदालतबाट कारागार चलान भएका फरार प्रतिवादीको आरडिटी मात्रै गर्ने गरिएको छ । “एकैदिनमा पिसिआरको रिपोर्ट आउन सम्भव नभएकाले आरडिटीको रिपोर्टअनुसार उनीहरुलाई कारागारमा ल्याउने गरिएको छ”, उहाँले भन्नुभयो, “त्यस्ता व्यक्तिलाई १० दिनसम्म छुट्टै राखेर मात्रै अरु कैदीबन्दी भएको ठाउँमा व्यवस्थापन गर्छौं ।” कारागार प्रशासनले गत चैतदेखि नै कैदीबन्दी भेटघाट पूर्णरुपमा बन्द गरेको छ । बाहिरको व्यक्तिलाई पनि कैदीबन्दीसँग भेटघाट गर्न कडाइ गरिएको छ । सबै कैदीबन्दीलाई साबुनपानीले हात धुन, मास्क र स्यानीटाइजर प्रयोग गर्न सचेतना प्रदान गरिएको छ । “बाहिरबाट आउने सामानलाई पनि २४ घण्टा राखेर मात्रै दिने गरिएको छ”, उहाँले भन्नुभयो, “कोरोनाको जोखिम न्यूनीकरणका लागि सबै उपाय अपनाएका छौँ ।”

कारागारमा हाल १९१ कैदीबन्दी छन् । त्यसमध्ये ६० जना थुनुवा र १३१ जना कैदी छन् । जिल्ला कारागारमा हालै मात्र नयाँ भवन निर्माण सम्पन्न भएको छ । नयाँ भवनको क्षमता ८० जनाको भए पनि ८३ जना कैदीबन्दी राखिएको छ भने ३५ जनाको क्षमता रहेको पुरानो भवनमा १०८ जना राखिएको छ । क्षमताभन्दा बढी कैदीबन्दी हुँदा कारागारका कैदीबन्दीलाई विगतदेखि नै समस्या हुँदै आइरहेको छ ।(रासस)