माओवादी केन्द्रका चार पूर्वनेता सांसद पदमा पुनर्बहालीको माग राख्दै सर्वोच्च अदालतमा
काठमाडौं, साउन १३ : सांसद पदमा पुनर्बहालीको माग राख्दै माओवादी केन्द्रका चार पूर्वनेताले सर्वोच्च अदालतमा रिट दाय गरेका छन्।
माओवादी केन्द्रको कारबाहीका कारण प्रतिनिधिसभा सदस्य पदबाट मुक्त भएकाे भन्दै उनीहरूले सर्वोच्च अदालतलाई गुहारेका हुन्।
हाल एमालेमा रहेका टोपबहादुर रायमाझी, लेखराज भट्ट, प्रभु साह र गौरीशंकर चौधरी परमादेशबाट सांसद पदमा पुनर्वहालीको माग गर्दै आज (बुधबार) सर्वोच्च गएका हुन्।
माओवादी केन्द्र अध्यक्ष पुष्पकमल दाहाल ‘प्रचण्ड’को पत्रका आधारमा संसद सचिवालयले आफूहरुलाई सांसद पदबाटै मुक्त गर्ने निर्णय संविधान भएको उनीहरुको तर्क छ।
प्रचण्डले गत चैत २६ गते ती सांसदहरुलाई पदमुक्त गर्न संसद सचिवालयमा पत्र पठाएको थियो। उक्त कारबाही माओवादीको विधानविपरीत समेत रहेको उनीहरुको जिकिर छ।
उनीहरूले आफूहरूले दल त्याग नगरेको दाबी गरेका छन्। निर्वाचन आयोगले असार २३ गते दिएको विवरणमा आफूहरू माओवादी केन्द्रकै सदस्य रहेको उनीहरुको भनाइ छ।
आफूहरुमाथिको सदस्यता खारेजको निर्णय बदरभागी हुनुपर्ने माग उनीहरुले अघि सारेका छन्।
