तीनै जना मृत भेटिएपछि निर्मलबस्ती शोकमा डुब्यो
तनहुँको व्यासनगरपालिका–१ निर्मलबस्तीमा एकै परिवारका तीन जना मृतावस्थामा भेटिएपछि निर्मलबस्ती क्षेत्र नै शोकमा डुबेको छ । अपाङगता भएका १५ वर्षीय छोरा विपिन श्रेष्ठ शुक्रबार, आमा ३४ वर्षीया रबिना र अपाङ्गता भएकी ११ वर्षीया छोरी प्रिया शनिबार मृत भेटिएपछि यतिबेला गाउँ शोकमा डुबेको छ ।
मृतक छोराको प्रहरीले मुचुल्का तयार गरी शुक्रबार नै शव परीक्षण गरी दाहसंस्कारका लागि आफन्जनलाई जिम्मा लगाएको थियो । छोराको मृत्यु हुनु दुई दिनअघि वैशाख १० गतेदेखि नै आमा र छोरी हराएपछि उनीहरुको खोजी गरिदिन आफन्तजनले प्रहरीमा जाहेरी दिएका थिए ।
मृतक छोराको घाँटीमा डोरीले बाँधेकोजस्तो दाग देखेपछि आमाले हत्या गरी फरार भएको हुनसक्ने प्रहरीले आङ्शका गरे पनि शनिबार आमाछोरी मादीसेती नदी किनारमा मृतावस्थामा भेटिएपछि प्रहरीले घटनाका ’boutमा अहिल्यै केही भन्न नसकिने बताएको छ ।
एकै परिवारका तीन जनाको मृत्युको खबरले यतिबेला गाउँ नै स्तब्ध भएको निर्मल टोल विकास संस्थाका अध्यक्ष अम्मर भण्डारीले जानकारी दिनुभयो । “सोच्न पनि नसकिने गरी गाउँमा घटना घट्यो”, उहाँले भन्नुभयो, “यस घटनाले हामी सबैलाई शोकमग्न बनाएको छ ।”
मृतक रविनाका श्रीमान् हरिकृष्ण श्रेष्ठ भारतीय प्रहरीबाट अवकाशपश्चात् भारतमै काम गर्दै आउनुभएको छ । यहाँ भएको घटनाका ’boutमा दाजुलाई जानकारी गराइसकिएको भाइ मोहनकृष्ण श्रेष्ठले बताउनुभयो । भारतबाट सायद एकदुई दिनभित्र हरिकृष्ण घरमा आइपुग्ने स्थानीयवासी एवं आफन्तजनले अपेक्षा गरेका छन् ।
शुक्रबार मात्रै मृतक छोराको दाहसंस्कार गरेको घटना सेलाउन नपाउँदै फेरि अर्को घटना थपिनुले आफूलाई चकित बनाएको वडाध्यक्ष खरसिं दरैले बताउनुभयो । “रबिना वडाको राम्रै व्यक्ति हुन्, सोच्न पनि नसकिने गरी यस्तो दुःखद् घटना कसरी घट्न पुग्यो, उनका छोराछोरी दुवै अपाङगता थिए । हिँडडुल गर्न सक्दैनथे”, उहाँले भन्नुभयो “उनीमा नकारात्मक सोच आएका कारण यस्तो घटना घटेको हुनसक्छ ।”
तीन दिनदेखि आमाछोरी सम्पर्कविहीन रहँदै आएपछि प्रहरीले खोजीकार्यलाई तीव्रता दिँदै आएको थियो । जिल्ला प्रहरी कार्यालय तनहुँका प्रहरी नायब उपरीक्षक लीलाराज लामिछानेका अनुसार परिवारका अन्य सदस्यले आमाछोरी नदीमा बेपत्ता भएको हुनसक्ने भन्दै खोजतलास गरिदिन आग्रह गरेपछि मादी र सेतीनदी किनारमा खोजी गर्दै जाँदा आमाछोरी मृतावस्थामा फेला परेका हुन् ।
छोरी प्रियाको ऋषिङ गाउँपालिका–१ कैदिमस्थित मादीसेती र आमा रबिनाको ऋषिङ गाउँपालिका–३ मास्दीघाटमा शव भेटिएको उहाँले जानकारी दिनुभयो । आमाछोरी नदीमा हामफाली आत्महत्या गरेको हुनसक्ने प्रहरीले जनाएको छ । मृतक दुवैको शव परीक्षण गरी शनिबार नै दाहसंस्कार गरिएको थियो ।- रासस
