द्रुतमार्गका रूपमा तीन वटा कोरिडोर निर्माण हुँदै

पाँचथर, ७ असोज : द्रुतमार्गका रुपमा विकास गर्ने उद्देश्यसहित पाँचथरमा तीन वटा कोरिडोर सडक निर्माण कार्य शुरु भएको छ । जिल्लाको उत्तरी क्षेत्रलाई समेट्न हेवा कोरिडोर, मध्य क्षेत्रलाई समेट्न निवु कोरिडोर र दक्षिणी क्षेत्रलाई समेट्न नावाँ कोरिडोर सडक निर्माण शुरु भएको हो । तीन वटै कोरिडोर पहाडै–पहाड निर्माण गरिएका अन्य सडकहरुलाई समेट्दै तमोर कोरिडोर सडकमा जोडिनेछन् । तमोर कोरिडोर धनकुटाको मुलघाटबाट पाँचथर–ताप्लेजुङ हुँदै नेपाल–भारत–चीन जोड्ने त्रिदेशीय सडक हो । हालसम्म पहाडै–पहाड सडक विस्तार गर्ने गरिएकामा तमोर नदीको किनार हुँदै तमोर कोरिडोर निर्माण अघि बढेपछि जिल्लाभित्र पर्ने खोलाका किनार हुँदै द्रुतमार्गका रूपमा कोरिडोर सडक निर्माण शुरु गरिएको हो ।

यी तीन वटै कोरिडोरहरु प्रदेश नं १ सरकारले विशेष प्राथमिकतामा राखेको मुख्यमन्त्री ग्रामीण सडक आयोजनाअन्तर्गत निर्माण थालिएका हुन् । पूर्वाधार विकास कार्यालय पाँचथरका अनुसार गत आर्थिक वर्ष २०६७÷०७७ मा तीन वटै कोरिडोरमा समान रु ८७ लाख बजेट विनियोजन भएको थियो । उक्त बजेटबाट कोरिडोरहरुको विस्तृत परियोजना प्रतिवेदन (डीपीआर) निर्माण तथा ट्र्याक निर्माण कार्य शुरु भएको पूर्वाधार विकास कार्यालय पाँचथरका निमित्त प्रमुख ललितकुमार चौधरीले जानकारी दिनुभयो । चालु आर्थिक वर्षका लागि तीन वटै कोरिडोरका लागि समान रु एक करोड १० लाख बजेट छुट्टिएको र कार्यान्वयनको अख्तियारी प्राप्त हुन लागेको निमित्त प्रमुख चौधरीले बताउनुभयो ।

गत आ.मा हेवा कोरिडोरको २.७६ किमी, निवु कोरिडोरको २.६ किमी र नावा कोरिडोरको ३.९ किमी ट्र्याक निर्माण सम्पन्न भएको छ । यस्तै हेवा कोरिडोरको २१ किमी र नावा तथा निवु कोरिडोरको समान २३ किमीको डीपीआर तयार भएको पूर्वाधार विकास कार्यालयले जनाएको छ । कोरिडोर सडकहरुको चौडाइ आठ मिटर हुनेछ । नावा कोरिडोर २३ किलोमिटरको हुने तय भए पनि बाँकी दुई कोरिडोरको डीपीआर चालु आवमा मात्रै पूरा हुने पूर्वाधार विकास कार्यालयका निमित्त प्रमुख चौधरीको भनाइ छ । द्रूतमार्गको रूपमा विकास हुने तीन वटै सडकले जिल्लावासीलाई ठूलो लाभ मिल्ने भए पनि चाँडो निर्माण कार्य पूरा गर्न यथेष्ट बजेटको सुनिश्चिता हुनुपर्ने चौधरीको भनाइ छ । “तीन वटै कोरिडोर मुख्यमन्त्री ग्रामीण सडक आयोजनामा समावेश भएकाले निर्माण अघि बढ्ने निश्चित छ”, चौधरीले भन्नुभयो, “तर भौगोलिक विकटता र ठूलाठूला चट्टान पार गर्नुपर्ने भएकाले यथेष्ट बजेटको सुनिश्चिचता भइदिए निरन्तर निर्माण कार्य अघि बढाउन सहज हुन्थ्यो ।”

फिदिम नगरपालिका–४ माझीटार शुरु विन्दु रहेको हेवा कोरिडोर नेपाल–भारत सीमावर्ती फालोट क्षेत्रसम्म विस्तार गर्ने सरकारी लक्ष्य छ । यस कोरिडोरले फिदिम नगरपालिकासहित हिलिहाङ र फालेलुङ गाउँपालिकामा पर्ने विभिन्न गाउँहरुलाई समेट्छ । निवु कोरिडोर फिदिम नगरपालिका र कुम्मायक गाउँपालिकाको सीमामा पर्ने सिवादोभानमा शुरु विन्दु भई पाँचथर–इलाम सीमावर्ती राँके बजारमा जोडिनेछ । यस कोरिडोरले फिदिम र फाल्गुनन्द गाउँपालिकालाई समेट्दै मेची राजमार्ग र तमोर कोरिडोरलाई द्रूत मार्गबाट जोड्ने कामसमेत गर्ने यहाँका स्थानीयवासी एवं संविधानसभा सदस्य अइन्द्रसुन्दर नेम्वाङको भनाइ छ । नावा कोरिडोरले तुम्बेवा र मिक्लाजुङ गाउँपालिकालाई समेट्छ भने तमोर कोरिडोर र राँके–रबी–भेडेटार सडकलाई जोड्ने द्रूतमार्ग समेत बन्छ ।

निवु कोरिडोर निर्माणका लागि पहल गर्दै आउनुभएका संविधानसभा सदस्य नेम्वाङ कोरिडोर सडकले निर्माणका क्रममा कमभन्दा कम क्षति गर्ने, द्रूतमार्ग र अन्य सडकहरुको पहुँचमार्गका रूपमा विकास हुने भएकाले यसको निर्माणमा विशेष जोड दिइएको बताउनुहुन्छ । “तमोर कोरिडोर निर्माण थालिएपछि नदीको किनारैकिनार सडक निर्माण गर्न सके स्थानीयवासीले धेरै लाभ प्राप्त गर्ने देखियो”, नेम्वाङले भन्नुभयो, “त्यसैले जिल्लाभित्र साना कोरिडोर निर्माण थालिएको हो, कोरिडोर सडकहरुका बहुआयाम छन् ।” द्रूतमार्ग हुनाले कृषि उपजको निकासी, गाउँहरुसम्म विशेषतः ढुवानीका ठूला सवारीका साधन भित्र्याई, व्यापारिक केन्द्र निर्माण, नागरिकलाई सहज पहुँच पुग्ने अपेक्षा गरिएको नेम्वाङको भनाइ छ । सडकको पहुँच पुर्याउन भन्दै यहाँका गाउँहरुमा निर्माण भएका सडकका ट्र्याकहरु अहिले अलपत्र जस्तै अवस्थामा पुगेका छन् । खोलाहरुमा पुल नहुँदा सडकहरु त्यहीँ टुङ्गिएका समेत भेटिन्छन् । कोरिडोर सडकहरुले अलपत्र परेका सडकहरु ब्युँत्याउने संविधानसभा सदस्य नेम्वाङको जिकिर छ । (रासस)