भारतीय साइकलयात्री लुइँटेल दमकमा

दमक, ११ चैत : महिला हिंसाको अन्त्य तथा पर्यावरणमा सचेतना दिने उद्देश्यले भारतको आसाम, गुवाटीका २० वर्षीय साइकलयात्री पवन शर्मा लुइँटेल दमकमा आइपुग्नुभएको छ ।

आसामबाट सुरु गर्नुभएको उहाँको साइकलयात्रा नौ दिनका अवधिमा बिहीबार साँझ दमक आइपुगेको थियो । उहाँलाई आज नेपाल–भारतमैत्री सङ्घ दमकले यात्राको सफलताको शुभकामना दिँदै ढाकाटोपी र खादा लगाएर सम्मान गरिएको उपाध्यक्ष दिनेश अग्रवालले जानकारी दिनुभयो ।

कार्यक्रममा यात्री लुइँटेलले यात्राको अनुभव सुनाउनुभएको थियो । यात्रालाई सफल बनाउन भारतमा उहाँलाई स्थानीय केही सङ्घसंस्थाले सहयोग पु¥याएका थिए तर यता भने त्यस्तो सहयोगी संस्था नभएको दुखेसो उहाँको छ । नेपालमा पहिलोपटक आएका उहाँले अब बढीमा १० दिनभित्र नेपालको काठमाडौँसम्मको यात्रा सफलतापूर्वक सम्पन्न गर्ने लक्ष्य रहेको जानकारी दिनुभयो ।

१९ दिन लगाएर करिब ९७६ किलोमिटर यात्रा टुङ्ग्याउने जनाउनुहुँदै उहाँले भन्नुभयो, “सबैको सहयोगबाट नै मैले यो यात्रालाई दुई देशसम्म जोड्न सकेको छु ।” साइकलबाट भारतको आसाम घुमिसक्नुभएका उहाँले अब ‘अल इन्डिया’ हुँदै विश्वयात्रासम्म निस्कने लक्ष्य राखेको बताउनुभयो । सामान्य साइकलमार्फत दैनिक ७० किलोमिटर दूरी यात्रा गरी आउनुभएका उहाँले बाटोमा आफ्नो यात्राको उद्देश्य पनि सुनाउँदै आएको जानकारी दिनुभयो । गन्तव्यमा पुग्नु मात्र आफ्नो उद्देश्य नभएको जनाउँदै उहाँले महिला हिंसा नियन्त्रण गर्न तथा स्वच्छ पर्यावरण जोगाउन आफ्नो मुख्य उद्देश्यका ’boutमा समेत सचेतना दिँदैआएको बताउनुभयो ।

सूचना, प्रविधिमा स्नातक तहमा अध्ययनरत नेपालीमूलका भारतीय युवा लुइँटेलको साइकलयात्रालाई समाजले प्रोत्साहन दिनुपर्ने खाँचो औल्याइएको छ ।(रासस)