शेखर कोइरालाद्वारा दोलखा झुलेमा नवनिर्मित विद्यालय भवन हस्तान्तरण


दोलखा जिल्लाको तामाकोसी गाउँपालिका वडा नं दुई मा अवस्थित अमर माध्यामिक विद्यालयको नव निर्मित २१ कोठे भवन नेपाली काङ्ग्रेसका केन्द्रिय सद्स्य शेखर कोइरालाले सनिवार मङ्सिर २३ उदघाटन गर्दै चावी तामाकोसी गाउँपालिका प्रमुख ईश्वरचन्द्र पोख्रेललाई एक भव्य कार्यक्रमका बिच झुलेमा हस्तान्तरण गर्नु भयो ।



शेखर कोइरालाबाट प्राप्त चावी गाउँ पालिका प्रमुख पोखरेलले विद्यालय व्यवस्थापन समितिका अध्यक्ष श्रीबाबु कार्कीलाई हस्तान्तरण गरेर विद्यालय भवन संचालनको स्वीकृति प्रदान गर्नुभयो । अमर माध्यमिक विद्यालयका व्यवस्थापन समितिका अध्यक्ष श्रीबाबु कार्कीको अध्यक्षतामा भएको कार्यक्रमको संचालन प्र अ तिर्थ बहादुर पौडेलले गर्नु भएको थियो भने स्वागत मन्तव्य व्यवस्थापन समितिका सदस्य भवेन्द्र कार्कीले गर्नु भएको थियो ।

उक्त उदघाटन समारोहमा प्रमुख अतिथि शेखर कोइराला हुनुहुन्थ्यो भने विशेष अतिथिको रुपमा नेकपा दोलखाका अध्यक्ष एवं तामाकोसी गाउँ पालिका प्रमुख ईश्वरचन्द्र पोख्रेलले सम्बोधन गर्नु भएको थियो । नेपाली काङ्ग्रेस दोलखाका सभापति लगायत काङ्ग्रेस नेताहरु देवी प्रसाद न्यौपाने , ईश्वर मानन्धर , बर्मा लामा , वालकृष्ण आचार्य , विनिता काफ्ले , युधिस्ठिर खडका समेतले सम्बोधन गर्नु भएको थियो भने नेकपा तीन नम्वर प्रदेस सदस्य वसन्तराज कार्की र जिल्ला आयोजना कार्यन्वयन इकाई शिक्षा प्रमुख देव कुमार बरालले आफ्नो मन्तव्य राख्नु भएको थियो । एसियाली विकास वैँकको ऋण सहयोगमा ४ करोड ,४८ लाख ७० हजार रुपैयाँ लागतमा विद्यालय भवन निर्माण सम्पन्न भएको हो । उक्त भवन उदघाटन समारोहमा सो विद्यालयका सँस्थापक स्वर्गीय अमर बहादुर कार्की र श्रीमती रत्न कुमारी कार्कीको नाममा एक लाख पचास हजार रुपैयाँको छात्रवृत्ति कोष पनि घोषणा गरिएको छ । स्वर्गीय अमर बहादुर कार्कीका छोरी जुवाइँ कमलामाइ नगरपालिका -५ सिन्धुली निवासी मेनका थापा र दिलिप जंग थापाले आफ्ना मातापिता( सासू ससुरा)को नाममा सो कोष स्थापना गर्नु भएको हो ।

एक लाख पचास हजार रुपैयाँको अक्षय कोषबाट प्राप्त ब्याज गरिब तथा जेहेन्दार विधार्थीको लागि प्रोत्साहन स्वरुप प्रत्येक वर्ष वितरण गरिने छ । नेपाली काङ्ग्रेसका नेता एवं अमर माध्यमिक विद्यालयका पुर्व शिक्षक आदर्शवान नेता स्वर्गीय भीमबहादुर तामाङको सातौं पुन्य स्मृतिमा रक्त दानकार्यक्रम समेत जिल्ला रेडक्रस दोलखाको प्राविधिक संयोजनमा सम्पन्न भएको थियो ।



प्रमुख अतिथि शेखर कोइरालाले श्रीबाबु कार्कीलाई रक्तदान ब्याग हस्तान्तरण गरेर भीमबहादुर तामाङको जन्म भुमिमा , उनले अध्यापन र नेतृत्व गरेको विद्यालय भवन उदघाटन गर्न पाउँदा आफू धन्य भएको र हर्ष बिभोर भएको बताए । रक्तदाताहरूलाई माला र खादा लगाएर कोइरालाले सम्मान व्यक्त गरेका थिए । उक्त अवसर पारेर स्वर्गीय भीम बहादुर तामाङको झुले स्थिति निवासमा कोइराला पुगे र तामाङप्रति गहिरो सम्मान र श्रद्धाञ्जली अर्पण गरे ।